Mitt uppáhalds te

Ég er nýbúin að uppgötva þetta te. Grænt te með epla- og mintubragði. Get drukkið endalaust af því.

Chicken Tikka Masala

Hér kemur kjúklingarétturinn sem ég gerði um helgina. 

um það bil 800 g kjúklingabringur, skornar í litla bita
1 laukur, fínt saxaður 
5 hvítlauksrif, pressuð
2 msk ferskt engifer, rifið
um það bil 800 ml tómatmauk
2 msk túrmerik
2 msk kummin
2 msk garam masala
1/2 msk cayennepipar
200 ml hrein jógúrt
salt
olía
ferskur kóríander

Hitið olíu á pönnu og steikið kjúklingabitana á öllum hliðum. Nokkrar mínútur eru nægur tími þar sem kjúklingurinn verður síðan soðinn í sósunni. Takið kjúklinginn af pönnunni og steikið laukinn þar til hann er orðinn mjúkur. Bætið þá hvítlauk og engifer út á og steikið í um það bil 1 mínútu. Bætið þá tómatmaukinu, túrmerik, kummin, garam masala og cayennepipar út á. Látið sjóða og bætið svo kjúklingnum út í og sjóðið við meðalhita í um það bil 15 mínútur. Hrærið í af og til. Takið af hitanum og hrærið jógúrtinni út í. Smakkið og bætið salti út í ef þarf. Berið fram heitt með meira af hreinni jógúrt og ferskum kóríander. Gott að hafa hrísgrjón og naan-brauð með. Við keyptum tilbúið naan-brauð sem við pensluðum með bræddu smjöri og settum svo inn í ofn í nokkrar mínútur. 

Grjónagrautur í ofninum

Börnin hoppuðu hæð sína á loft í morgun þegar ég tjáði þeim að það yrði grjónagrautur í kvöldmatinn. Mér dettur ekki til hugar að gera hann í potti eftir að ég rakst á þessa uppskrift á www.ljufmeti.com. Ég brenni nefnilega alltaf grautinn við og það jafnvel þó ég standi yfir honum allan tímann og hræri og hræri. Þessi útgáfa er bara snilld. Enginn viðbrenndur matur og engin sár úlnliður eða öxl. 

• 2 1/2 dl hrísgrjón
• 1 1/4 ltr nýmjólk
• nokkrar smjörklípur
• 1 tsk salt
• 1 msk sykur

Hitið ofninn í 175°C. Blandið öllum hráefnum saman í stórt eldfast fat (minnst 2 ltr). Setjið álpappír yfir og bakið í miðjum ofni í um það bil 1 1/2 klst. Þegar grauturinn er tilbúinn er efsta laginu á honum flett af og hrært vel í honum. Þynnt með mjólk ef þarf. 

Um helgina gerði ég svakalega góða Chicken Tikka Masala. Uppskriftina mun ég setja inn þegar ég nenni að íslenska hana. 

Taco-terta

f. 6-8

1 lítill blaðlaukur

1 msk ólífuolía

hvítlaukur (ég notaði 1 stórt rif)

1 pk af stórum tortillakökum

500 g nautahakk

1 pk taco kryddblanda

1 krukka tacosósa (bragðstyrkur eftir smekk)

2,5 dl sýrður rjómi

1 dl rjómi

200 g Philadelfía rjómaostur

1 lítil dós maís

salt

grófmalaður svartur pipar

ca 3 dl rifinn ostur

1. Stillið ofninn á 225°C

2. Hitið olíuna á stórri pönnu og steikið blaðlaukinn þar til hann er orðinn mjúkur. Brúnið þá hakkið á pönnunni. Setjið taco-kryddið, hvítlaukinn og taco-sósuna út á og látið malla í smástund.

3. Blandið saman sýrðum rjóma, rjóma, rjómaosti, maís og rifnum osti í skál. Saltið og piprið eftir smekk.

4. Setjið tortillakökur, hakk og ostablöndu lagskipt í lausbotna form. Byrjið á að setja tortillaköku á botninn, síðan hakk, tortillaköku, ostablöndu, tortillaköku o.s.frv. Endið á ostablöndu.

5. Bakið í miðjum ofni í u.þ.b. 20 mín. eða þar til tertan er byrjuð að verða gullinbrún. Takið út og látið standa í um 5 mín. áður en kanturinn á forminum er tekinn af og tertan borin framan.

Borið fram með sýrðum rjóma, salsa, guacamole og fersku salati

Rak augun í þetta gamla blogg núna í morgun. Mundi ekki að ég hefði verið með það enda aðeins um hálfs mánaðar ævintýri hjá mér. Ætla að endurvekja það því mig er lengi búið að langa til að skella uppskriftunum mínum inn á blogg, þegar ég hef prófað nýja uppskrift sem mér eða okkur líkar við. Finnst betra að geta haft þær á vefnum heldur en í skjali því þessar blessuð tölvur hrynja með reglulegu millibil og ég tapa þá oft góðum uppskriftum.